An yabawa Independent Hajj Reporters a kan samar da kafar labarai ta Hausa

0
5

Daga Jabiru A Hassan, Kano. Maniyyata zuwa aikin Hajji da Umrah, da sauran masu ruwa da tsaki a harkar na jihar Kano sun bayyana jin dadin su bisa yadda Independent Hajj Reporters (IHR) ta kirkiro sabuwar kafar yada labarai da ta Hausa. Sun kuma ce ko shakka babu wannan kafar yada labaran tazo daidai lokacin da a ke bukatar ta, musamman ganin cewa mafiya yawan maniyyata dake fitowa daga yankunan karkara ba sa jin wani harshen sai Hausa, wanda hakan abin a yaba ne kwarai da gaske. Malam Ahmad Lawan Abdullahi, Wanda kuma yake cikin kungiyar masu taimakon Alhazai a Kano tun shekaru fiye da 30, yace ” kirkiro hanyar bada rahotannin aikin Hajji da Umrah abu ne da zai samar da wayewa da sanin halin da maniyyata suke ciki, tareda basu dama wajen bayyana ra’ayoyin su da yadda masu ruwa da tsaki suke yi musu hidimomi tun daga gida Nijeriya zuwa kasa mai tsarki”. in ji shi. Shima a nasa tsokacin, mamba a kwamitin kula da aikin Hajji a jihar Kano, Alhaji Musa Haruna yace sun ji dadin kirkirar kafar yada labarai da rahotanni kan aikin Hajji da Umrah cikin harshen Hausa. Ya jaddada cewa za’a sami Karin dama ta jin halin da maniyyata suke ciki tun daga fara shirin tafiya kasa mai tsarki da kuma yadda hukumomin kula da aikin Hajji na jihohi da ta kasa baki daya suke sauke nauyin da aka dora musu na tafiyar da aikin Hajji da Umrah cikin nasara. Tuni dai wannan sabuwar kafar yada labarai kan aikin Hajji da Umrah ta fara aikin ta wanda al’uma suke murna da kirkirar ta, sannan wasu suna bayyana fatan su na gaggauta Samar da kafar radiyo da talabijin domin kara bunkasa aiyuka da wayar da kai.

LEAVE A REPLY

Please enter your comment!
Please enter your name here