Hukumar Yaƙi da Sha da Safarar Miyagun Ƙwayoyi, NDLEA a yau Lahadi ta gargaɗi maniyyata aikin Hajji kan safarar miyagun ƙwayoyi.
Habiba Zubair, jami’ar hukumar ta yi wannan gargadin ne a Ilorin a lokacin da take jawabi ga maniyyata aikin Hajjin 2022.
Ta yi gargadin cewa mahajjata za su iya tafiya da magungunan da likitoci su ka rubuta musu ne kawai zuwa Saudiyya saboda gwamnatin can ba za ta amince da wasu magunguna idan ba irin wadannan ba.
“Ya kamata ku guji magungunan da za su iya sanya wa a kama ku,” in ji ta.
Malama Zubair ta kuma gargadi maniyyatan da kada su tafi da goro ko garin yaji zuwa Saudiyya domin za a kwace su.
“Kada ku ɗauki wanda baku san juna ba ya ba ku kaya ku riƙe masa a kowane hali saboda za a iya yaudarar ku ku tafi da kayan da aka haramta a ƙasar,” in ji ta.
Jami’iar hukumar ta NDLEA ta kuma yi kira ga maniyyatan da su riƙa sanya suturar bai-ɗaya ta jiha domin saurin gane mahajjatan jihar.
